XƏBƏRLƏR
20.02.2017
IV BEYNƏLXALQ MULTİKULTURALİZM QIŞ MƏKTƏBİNİN İŞTİRAKÇILARI AZƏRBAYCANDAKI TOLERANT MÜHIT BARƏDƏ MƏLUMATLANDIRILIBLAR

Fevralın 18-də Dini Qurumlarla İş üzrə Dövlət Komitəsinin sədri Mübariz Qurbanlı Bakı Beynəlxalq Multikulturalizm Mərkəzinin və Azərbaycan Respublikasının Prezidenti yanında Bilik Fondunun birgə təşkilatçılığı ilə keçirilən “Multikulturalizm Azərbaycanda həyat tərzi kimi: İslam həmrəyliyi bizə nə verir?” adlı IV Beynəlxalq multikulturalizm qış məktəbinin müxtəlif ölkələrdən olan iştirakçıları ilə görüşüb.

AZƏRTAC xəbər verir ki, Azərbaycan Respublikasının Prezidenti İlham Əliyevin tövsiyəsi ilə təşkil edilən layihənin əhəmiyyətinə toxunan Mübariz Qurbanlı sayca dördüncü olan Beynəlxalq multikulturalizm qış məktəbinin həm beynəlxalq miqyas, həm də sivilizasiyalararası əlaqələrin təmin olunması baxımından çox böyük əhəmiyyətə malik olduğunu qeyd edib.

Mübariz Qurbanlı görüş iştirakçılarına ölkəmiz haqqında məlumat verərək bildirib ki, Azərbaycan Ermənistan tərəfindən təcavüzə məruz qalıb, ərazimizin 20 faizi işğal edilib. İşğal nəticəsində 1 milyona yaxın azərbaycanlı öz yurd-yuvasından, doğma məskənlərindən çıxarılıb. Ermənistan tərəfi, xüsusilə xaricdə olan erməni təşkilatları və lobbisinin təsirində olan qruplar Azərbaycan haqqında yanlış məlumat yaymaqla öz təcavüzünü ört-basdır etmək istəyir. Ona görə də sizin kimi gənclərin, bu cür qrupların dostluq niyyəti ilə Azərbaycana gəlməsi bizim üçün çox əhəmiyyətlidir.

Komitə sədri 18 ölkədən olan tələbələrlə görüşdə ölkəmizdə hökm sürən tolerantlıq mühiti, xalqımıza məxsus multikultural dəyərlər, ayrı-ayrı dinlər və konfessiyalar arasında qarşılıqlı hörmət və etimada əsaslanan əməkdaşlıq münasibətləri haqqında məlumat verib.

Əhalinin 96 faizinin İslam dininə mənsub olduğunu bildirən Komitə sədri Azərbaycanda 2 mindən çox məscidin olduğunu vurğulayıb. Mübariz Qurbanlı, eyni zamanda, ölkəmizdə müxtəlif dini konfessiyaların nümayəndələrinin əsrlərdir sərbəst və qarşılıqlı anlaşma şəraitində fəaliyyət göstərdiklərini, onların dilinə, dininə, mədəniyyətinə xalqımızın daim yüksək qiymət verdiyini və hörmətlə yanaşdığını, dövlət tərəfindən mütəmadi olaraq İslam və qeyri-islam dini icmalarına maliyyə yardımı göstərildiyini qeyd edib.

Komitə sədri dövlətimizin başçısı İlham Əliyevin 2016-cı ili “Multikulturalizm İli”, onun məntiqi davamı kimi bu ili “İslam Həmrəyliyi İli” elan etməsinin bütün dünyaya həmrəylik çağırışı olduğunu diqqətə çatdırıb. Mübariz Qurbanlı qeyd edib ki, bu, həm İslam aləmi daxilində, həm də dünyada müxtəlif sivilizasiyalar arasında həmrəyliyə töhfə verəcək.

Bu il, həmçinin Azərbaycanda IV İslam Həmrəyliyi Oyunlarının keçiriləcəyini bildirən DQİDK sədri bu Oyunların da İslamdakı həmrəyliyə həsr olunduğunu vurğulayıb. Komitə sədri Beynəlxalq multikulturalizm qış məktəbinin müxtəlif ölkələrdən olan iştirakçılarına işğal altındakı torpaqlarımızda erməni vandalizminə məruz qalan tarixi-dini abidələrimiz və Azərbaycan həqiqətləri, ölkəmizdəki tolerant mühiti barədə Dövlət Komitəsinin nəşri olan kitablar təqdim edib.

Qeyd edək ki, IV Beynəlxalq multikulturalizm qış məktəbi fevralın 13-də fəaliyyətə başlayıb.

Fevralın 20-dək davam edəcək IV Beynəlxalq multikulturalizm qış məktəbində Azərbaycan ilə yanaşı, Portuqaliya, İtaliya, Almaniya, Rusiya, Çexiya, Bolqarıstan, Litva, İsrail, ABŞ, Makedoniya, Yunanıstan, Vyetnam, Gürcüstan, Qazaxıstan, Misir, Polşa, İordaniya və Rumıniyanın tanınmış universitetlərində təhsil alan tələbələr iştirak edirlər. IV Beynəlxalq multikulturalizm qış məktəbi ərzində yerli mütəxəssislərin və xarici alimlərin təqdimatında ölkəmizdəki milli və dini müxtəliflik, İslam həmrəyliyinin vacibliyi, Azərbaycan multikulturalizmi fənninin xaricdə tədrisi, Azərbaycan Respublikasının multikulturalizm siyasəti mövzusunda mühazirələr dinləniləcək, ölkəmizin multikultural və çoxkonfessiyalı nadir məkanlarına səfərlər, görkəmli dövlət və din xadimləri, eləcə də ölkəmizdə yaşayan müxtəlif dini və etnik icmaların nümayəndələri ilə görüşlər təşkil olunacaq.

Xatırladaq ki, indiyədək adıçəkilən qurumlar tərəfindən 2015-ci il 22 iyul-1 avqust, 2016-cı il 8-15 fevral, 2016-cı il 18-27 iyul tarixlərində də Beynəlxalq multikulturalizm məktəbləri fəaliyyət göstərib.

© 2004 - 2015 Avrasiya Tərcümə mərkəzi
Online konsultant
Təklif və şikayətlər